Oferta de obradoiros

Actividade centrada nas baleas co obxectivo de coñecer as súas características principais como animais mariños, así como as distintas especies que existen.

Proponse un achegamento á actividade corsaria e ao seu desenvolvemento en Galicia: a diferenza coa piratería, a súa regulación, as formas de actuar e os obxectivos.

Dispoñible a actividade en versión online.

Xogo de recoñecemento de diferentes especies mariñas a partir dunha pintura de Urbano Lugrís. As nenas e nenos irán descubrindo o universo pictórico do artista así como a representación dos elementos na pintura.

Actividade encamiñada ao descubrimento da praia como hábitat natural. Formúlanse cuestións como a formación da area da praia, o por que das mareas, que tipo de plantas viven nas dunas, etc. O obxectivo fundamental é ofrecer unha visión diferente da praia aprendendo a respectala como un espazo común onde tamén viven plantas e animais.

A actividade pretende fixar mediante o xogo unha serie de conceptos sobre as diferenzas entre as actividades de piratería e do corso, a súa natureza, obxectivos, o seu papel na sociedade do século XIX e o protagonismo galego neste ámbito.

Este obradoiro aborda a problemática da contaminación dos océanos. Propónselles ás persoas participantes un xogo para conciencialas sobre as consecuencias dos residuos que acaban no mar e a gran importancia da conservación dos océanos.

Actividade lúdica desenvolvida dende a liña do descubrimento e o xogo para coñecer en que consiste o traballo da arqueoloxía subacuática, dende a exploración dos fondos mariños ata a interpretación dos depósitos arqueolóxicos e a formulación de hipóteses

A actividade pretende dar a coñecer os capítulos máis salientables da obra Vinte mil leguas de viaxe submarina; especialmente o relativo á chegada do submarino Nautilus á baía de Vigo, cando recala na cidade atraído polo suposto tesouro dos galeóns de Rande. O obradoiro fai especial fincapé nos obxectos que conserva o Museo Massó recuperados na enseada de San Simón, como un canón extraído das augas no ano 1958, e que pertencen a embarcacións afundidas que participaron na famosa batalla de Rande no ano 1702.

A partir dunha introdución sobre as características principais das baleas e as diferentes ameazas ás que se ven sometidas, as persoas participantes realizarán dous pequenos murais mediante a técnica do collaxe. Unha das imaxes estará baseada na caza das baleas e os diferentes perigos que corren e a outra representará a importancia de conservar a especie como parte dun ecosistema.

Actividade centrada no episodio da expedición naval da primeira volta ao mundo e os motivos comerciais que a impulsaron.

A partir dun mapa e dalgunhas pistas, as persoas participantes terán que encontrar as diferentes partes dun crebacabezas coma se dun tesouro se tratara.

Este obradoiro aborda a temática dos ecosistemas das Rías Baixas a través de especies representativas vencelladas co discurso da exposición permanente. Por outra banda, faise fincapé na concienciación do coidado ambiental a través da reciclaxe.

Dispoñible a actividade en versión online.

Con esta actividade achegaremos de forma atractiva e interactiva os contidos principais do relato museístico da exposición permanente: a conquista do mar e a explotación dos recursos do mar, a través da industria conserveira e baleeira, aprendendo o vocabulario específico escrito e oral en inglés con xogos e preguntas.

A arte de navegar require de coñecementos en materias como astronomía, matemáticas, xeometría e cartografía. Neste obradoiro coñecerán e descubrirán as partes principais dun barco e a distribución de tarefas que se realizan a bordo mediante un xogo en equipo onde a tripulación deberá superar algunhas probas empregando coñecementos básicos de diferentes disciplinas.

O MassoMakion é unha versión do quebracabezas máis antigo que coñecemos, o Stomakion, que foi ideado no século III antes da nosa Era por Arquímedes de Siracusa.

No MassoMakion proponse un xogo a partir dos deseños das latas da empresa Massó e as formas xeométricas. Pódense construír ata catro deseños diferentes coas pezas do tangram.

Dispoñible a actividade en versión online.

Obradoiro sobre as artes de pesca e a división por xénero do traballo no sector pesqueiro, desenvolvido a partir de contidos da sección da exposición permanente dedicada á industria baleeira e da mostra temporal Crecer co mar. Os gozos e as sombras dunha vila mariñeira. Conclúese cunha actividade manual que consiste na elaboración dun animal mariño coa técnica do origami.

Dispoñible a actividade en versión online.

As mensaxes dentro das botellas agochadas polas salas de exposición revelarán ás persoas participantes a importancia que teñen os océanos para o noso planeta, tanto para a diversidade das especies como pola súa influencia no clima. Mediante un xogo deberán completar unhas tarxetas que aportarán as pistas necesarias para atopar as mensaxes.

Obradoiro didáctico que se achega ao episodio histórico da batalla de Rande e ao mito dos tesouros dos galeóns afundidos. As persoas participantes tamén terán que elaborar un taboleiro para xogar ao xogo de afundir a frota inspirado nesta batalla.

Este obradoiro céntrase no deseño gráfico dende o punto de vista do marketing. As persoas participantes coñecerán a evolución dos deseños nas latas de conserva da empresa Massó Hermanos e, logo, terán que crear o seu propio deseño.

Este taller explica o papel fundamental do sal na conservación dos alimentos e a importancia da súa comercialización ao longo da historia, chegando a alcanzar grandes repercusións económicas e políticas. Prestarase maior atención ao uso do sal en Galicia para a conservación do peixe e á visibilización do traballo das mulleres na industria da salga, sendo esta un método de conservación empregado durante moitos séculos antes de que existiran as conservas enlatadas e os conxeladores.

Obradoiro práctico de aprendizaxe de 5 nós mariñeiros básicos: Cote, Ás de Guía, Chan, Oito e Ballestrinque. Explicarase a súa orixe e aplicación e, despois, montarase un pequeno cadro de nós.

Obradoiro práctico de aprendizaxe de nós mariñeiros básicos. Explicarase a súa orixe e aplicación e, despois, cada persoa participante elaborará un chaveiro cun tipo de nó mariñeiro.

O obradoiro consiste na realización dun ex-libris (selos estampados) para personalizar os libros das persoas participantes. Aprenderán a técnica de gravado sobre goma e a fabricación de matrices. Logo de coñecer o ex-libris que Antonio Massó deseñou para a biblioteca do Museo Massó, elaborarán e estamparán o seu propio selo.

Obradoiro con perspectiva de xénero. A través do caderno de apuntes de Bueu da artista galega Maruja Mallo e a súa serie pictórica  “La religión del trabajo”, traballaranse os coñecementos básicos sobre a vida nunha vila mariñeira no século XX, os distintos tipos de artes de pesca  e os oficios que se xeran arredor do traballo no sector pesqueiro,  en contraste coa vida que se desenvolvía no medio rural.

Actividade que xira ao redor da figura do pintor Urbano Lugrís e a súa vinculación co museo e a familia Massó. Proponse un xogo no que se trata de buscar en reproducións de cadros do pintor as pezas da colección do museo nas que se inspirou o artista para formar a súa particular iconografía.

Esta actividade pretende ofrecer ás novas xeracións referentes femininos no sector científico. Trátase dunha actividade didáctica adaptada a diferentes niveis escolares sobre o esquecemento intencionado ao longo da historia da achega realizada polas mulleres de ciencia. Neste obradoiro ademais de traballar coñecementos básicos sobre a astronomía e a súa aplicación a cuestións prácticas como a orientación na navegación, centrámonos na achega dalgunhas astrónomas que puideron ser recuperadas para a historia.