A industria conserveira definiu a identidade de Bueu como vila mariñeira e impulsou unha fase de desenvolvemento sen precedentes. É un exemplo paradigmático das transformacións do litoral galego.
Este proxecto expositivo pretende abordar a xénese e desenvolvemento histórico da vila de Bueu condicionada polo seu grao de implicación na explotación dos recursos do mar e, máis concretamente na industria da conserva do peixe. Identifícanse os axentes principais que deron lugar e víronse involucrados nunhas transformación sociais, económicas e culturais de gran alcance, para mostrar como estas transformacións foron configurando ao longo dos séculos a identidade desta vila mariñeira.
Xunto a este percorrido de configuración histórica dun territorio e da súa memoria colectiva, visibilízase o contrapunto crítico de como os testemuños históricos desta identidade foron destruídos nun tempo récord, desde os inicios do século XXI ata o día de hoxe.
A selección de bens expostos componse de fondos museográficos, fotográficos e documentais que forman parte da colección e arquivo do Museo Massó, e se complementan con préstamos de particulares.
A industria conserveira foi a actividade que definiu a configuración histórica de Bueu. Na enseada de Bueu a explotación dos productos do mar non sempre xogou un papel determinante. Durante os primeiros séculos da nosa era desenvólvese aquí un centro industrial e portuario vinculado coa transformación do peixe e a produción e comercialización de ánforas.
Despois da caída do Impero romano este núcleo de poboación abandona a franxa costeira. A recuperación plena da actividade pesqueira e a industria conserveira non se producirá ata o século XIX.
A empresa creada pola familia Massó é un claro exemplo do desenvolvemento que experimentou o litoral galego neste período.
Será a responsable de que Bueu ocupe no século XX un posto relevante no sector da conserva de peixe. Ademais foi o factor que desencadeou unha fase de desenvolvemento sen precedentes.
Hoxe é o legado cultural desta saga de empresarios o que o sitúa nun lugar preeminente.
Lamentablemente, os testemuños históricos que definiron a súa configuración como vila mariñeira e como un importante centro conserveiro foron destruídos nun tempo récord, desde o inicio de século ata a actualidade.
