Exposición das fotografías de Alberte Peiteavel
Produción propia
41 fotografías a cor
Autor: Alberte Peiteavel
Tamaño das fotografías: variable, dende 50 ata 150 cm de ancho
Comisario e coordinador: Roberto Aneiros García
Datas: do 11 de xuño ao 8 de novembro
Horario: martes a sábado de 10 a 20 h, domingos e festivos de 10 a 14 h., luns pechado.
Estas fotografías de Alberte Peiteavel foron sacadas para formar parte dun artigo sobre Ons da revista GPS e algunhas delas publicáronse naquela reportaxe, pero a maior parte non foron vistas polo público anteriormente.
Ao longo destas instantáneas poderemos observar unha serie de imaxes que forman parte da vida cotiá da illa e así encontrámonos con panorámicas do océano batente, as praias ou as rochas; a partir de aí descubrimos a pegada humana: unha fonte, unha casa, unhas nasas, etc. e o impresionante faro como exemplar arquitectónico. Pasamos logo por unha pequena galería de retratos dos habitantes da illa, e finalmente o recorrido insular finaliza con fotos da fauna e da flora. Para esta exposición realizouse un positivado especial en plotter e algunhas delas son transparencias colocadas en caixas de luz.
O fotógrafo, Alberte, viviu durante cinco días na illa e sobre o seu traballo aqueles días conta "A forma de traballar era localizar bos sitios nas peores horas de luz e logo ter controladas as horas de saída e posta do sol para así chegar aos lugares a fotografar nos mellores momentos de luz. Isto facía que en ocasións tivera que ir con noite pecha aos lugares, o que non sempre é doado se non coñeces ben bos camiños. Ademais, a pesar de ser noites moi despexadas, non había lúa, polo que eran especialmente escuras. Para facer unha das fotos tiven que baixar por un acantilado, non fun o suficientemente previsor e fíxoseme de noite abaixo, a verdade é que non foi precisamente doado saír de alí."
Ademais das fotos de Peiteavel, a mostra complétase coa proxección permanente de dous documentais Son de Ons (cortesía do CGAI) A illa de don Didio, ambos os dous cun fondo etnográfico e histórico e que supoñen un paseo pola memoria dun pobo. Tamén expoñemos unha ortofoto da illa e pequenos textos de sala nos que se proporcionan os datos e a información significativa para coñecer este arquipélago. Así mesmo, exponse un poema de Urbano Lugrís sobre a illa e unha lenda antiga de Ons.
En conclusión, esta pequena mostra é unha espléndida ocasión de contemplar imaxes singulares da illa e tamén de realizar un repaso da súa historia dun xeito moi sinxelo.
