CRONOLOXÍA: Equipo de mergullo de mediados do século XX. Compresor ou bomba de aire, cara a 1930.
Este é un equipo clásico e convencional na súa época utilizado ao longo do século XX nas reparacións náuticas, construcións portuarias e naufraxios. Formou parte do equipamento do Porto da Coruña entre os anos 50 e 60 e utilizouse tanto na Coruña como en Ferrol ata a xeneralización, na década de 1970, dos "traxes ra".
En España consérvanse poucos equipos orixinais deste tipo xa que durante a Guerra Civil fundiuse todo o material. Esta é a razón pola que no noso territorio os cascos máis antigos que podemos atopar son das décadas de 1940 e 1950.
Un equipo de mergullador semellante foi empregado na primeira e nas sucesivas inmersións de arqueoloxía submarina realizadas na baía de Rande para recuperar os "tesouros" dos galeóns afundidos na batalla de 1702.